El cantar de la Reina Unicorniu

Cada añu la reina Zonraconebū, viuda y ensin fíos, recibe a mil un guaḥes nos xardinos de la corte. En palaciu, los neños deprienden y crecen, y el reinu espoxiga con ellos, masque’l rei del país vecín envidia a Zonraconebū y traza planes escuros col envís d’entamar una guerra.

Col enemigu avanzando, un bruxu apaez pela corte. A cambiu de los unicornios del reinu, seres máxicos y amenazaos, el bruxu ofrez a la reina terminar cola guerra d’un golpe. Zonraconebū, que refuga la primer ufierta, acaba rindida énte’l so mayor deséu: la idea de tener una fía.

Pablo Fraile Dorado (Mieres, 1985) ye periodista y escritor. Llicenciáu na UCM, trabayó en medios como Europa Press y elmundo.es. Ye autor de llibros infantiles en castellán y asturianu, ente los que figuren Nueve cuentos azules, Arón el Gatorratón, Tigre va de gala, La llingua de les xanes y Bruxa, asina como de la novela de ciencia ficción Caleidoscopio, la so primer obra dirixida a adultos.

Antonio Acebal cuenta cuentos, hestorias con colores y con llinies, fai dibuxos del mundu y pa tol mundu. Cuenta y recuenta la hestoria de Sahar, de Bintou, la hestoria de Capiellina, Kalakamake, Arón, Gorgona o Xina. Cada páxina de color ye un mundu.