L’Asturiana

Nesta novela que tienes nes manes, Caroline Lamarche, ensin arrenunciar a la naturalidá y estilu que la carauteriza, va amosando, de manera sincera y oxetiva, la saga d’una familia nacida en Liège, la suya, a entamos de la revolución industrial y que se convirtió en precursora de la metalurxa del cinc n’Asturies cola Real Compañía Asturiana de Minas (Asturiana de Cinc). Un relatu de la hestoria de la industria asturiana dende’l so orixe.

Nun formatu que s’estrema de les noveles tradicionales o los relatos que carautericen a l’autora, va travesando una dómina qu’anuncia’l capitalismu qu’entama y la so ringlera de desigualdaes. Les fuertes personalidaes a les que se dirixe, les voces femenines que tresmite, l’homenaxe a un padre que-y abrió’l camín de los archivos familiares y, poro, a otros archivos, conviértenla na heredera ilustrada d’una lleenda familiar cosmopolita. Los testigos vivos a los que recurre esmenen el cuadru y cuestionen los sos aspeutos más tapecíos, qu’ella describe con desenvoltura, consciente de tar perdida ente dos mundos. «Estos golores, tanto del trabayu industrial como del gaxín, pertenecen a una infancia desapaecida. Falen d’un trubiecu bullindiegu, la odiada llimusina y les ventanes abiertes al son d’una melodía que solo caltién l’alcordanza de la mio dificultá p’atopar l’aliendu, el mio llugar».

Caroline Lamarche (Liège, Bélxica, 1955) pasó la so infancia y mocedá ente España y Francia, onde trabayaba’l pá como inxenieru de mines. Graduóse en Filoloxía Románica na Universidá de Liège. Punxo clase na so ciudá natal y en Nixeria.
Dende los sos primeros testos apuntaba alto: Premiu Internacional de Radio France y el Prix de la Fureur de Lire. Gana tamién el Premiu Victor Rossel.

La so obra tien una gran reconocencia na lliteratura francesa, ente les sos obres: L’Arbre rouge, poesía (1991), Le jour du chien, novela, (1996) (premiu Rossel), Carnets d’une soumise de province, novela (2004), Dans la maison un grand cerf, novela (2017) (premiu Europa de l’ADEF), o Nous sommes à la lisière, novela (2019), cola qu’algama’l premiu más prestixosu de la lliteratura francesa, el Goncourt de novela curtia.

Entró na Real Academia de la Llingua y la Lliteratura franceses de Bélxica nel añu 2014. Con too esto, dicen d’ella que ye heredera por voluntá propia d’escritores como Virginia Woolf, George Sand, Flannery O’Connor o Karen Blixen porque según les sos propies pallabres «enantes de convertise n’escritora, quixo prebar el traxe
d’escritora, que-y queda tan bien, y conquistar, entemeciendo’l nome de muyer col d’escritora, pa cola androxinia indispensable a la [so] función».